Von´nt Hasen jachtern

Et is Harwest balle kimmt de Winter. Fräuher, bet nah de Wenne, war dat de Tiet von dä groten Hasenjachten inne Börde. Man kunne da dröwwer Bäuker schremm, wat sick da sau allet affespeelt hat. Arlewnisse un Jeschichten dä hüte noch dä ollen Lüe kennen. Nich blot, weil soon Hasenbraen en ganz fienet Äten is un an Wiehnachten noch vor de Gäuse stund.

Lüe, Hase is nich Karnuckel!

Also et morjens dräpen sick de Jäjers un de Driewers sejjen wie mal vor `t Gasthus. Dann is man mit Päreespanne ,späder ook mit Treckers un Hängers inne Feldmark rut. Denn harre et eheiten „Utloopen“ un dabie worre en grotet Ackersticke von twe Sieten umstellt. Immer een Jäjer un een Driewer un een Jäjer un een Driewer sau lang henn bet man dän Acker umspannt harre, also en groten Kettel emakt hat.

Wenn nu en Hase oppstand un wechloopen wolle, wurre hei eschoten or ook nich. Denn Hasen mit Schrot* scheiten, dat will elehrt sien. Man mot mit dä Flinte immer en betchen forhollen. Dabie kommt et daropp an wie schnell dat Dier is. Un sau hat man bet in de 70ziger Jahre öwwer hundert Hasen an een Jachtach eschoten in de Feldmark von dä Dörper.

Na dä Jäjers hemm se ja nich traren mötten, awer soon Driewer mit fünf, söß Hasen oop`n Rüggen un denn öwern meßnatten swarten Acker - da wort dick de Spucke lang. Ook inne 70ziger worren de Hasen mit Nette efänget un denn gungen sei na de Franzosen un et jaf Geld davorr.

War so ne Jacht to Enne, jaf et veel to vertellen in`n Krauch un dä Arftensuppe smecke man tau scheen.

Jäjer Kruse un Jäjer Schulte harrn sick lange nich eseihn un raupen sick butten tau: „Tach Schulte“ - “Tach Kruse“ - „Lange nich eseihn. Wat hasse denn man da for een scheenen Lohenmantel an?“ - „ Schulte, dän harre mien Grotvader schon ebrukt ekofft, wu hei Konfimatschion harre. Da geiht nist dorch. Keen Wind nich, Rejen nich un ook keen Schrot!“, sejje disser un holle öhm twe präpareerte Patronen hen, wecke hei met Sand efüllt harre.

Schulte kieke ne an. „Stäke dä in diene Joppe un wi stellt uns opp de Wiesche hindert Hus un denn brennst du mick met 3mm ein opp mien Hindersten opp forzich Meters.“ „Dat sus de kreijen !“, sejje Schulte un sei loopen opp de Wiesche.

Nu harre awer Schulte siene Joppe veele Daschen ehat un ook noch wecke met scharpe Patronen drin. Hei griept also echte Schroe und täuwet nich lange un brennet Krusen ne Ladung opp sien Hinderdeil. Disser schrieet opp un renne met Vulldampf glieks de Dorpstrate run nah`n Dokter.

As hei stockstief nah ne Stunne wedder torügge kimmt, warn se denn alle twe for veele Jahr öhren Jachtschien lot ewest.

Opp dat passeert is, wett ick nich awer in Barjen, bie Grot Rohensläh, hemm se dat immer vertellt.

 

Dabie kimmt mick noch ne Vertellje ut de Waffenlose Tiet nah`n Kriech in Arinnerung. Un wie esecht soon Hasenbraen kam noch vor en Gausebraen. Awer ohne Flinte?

Hemm ji schon ma watt vonn`t Hasen Insingen eheert?

Dat will ick jüich noch beschriewen. Bie Näwel lien de Hasen dulle feste in öhre Satte. Wi bruken twe Mann un wenn denn en Hase utemakt is denn goan wi arstmal in en groten Bojen um ne rum. De Arste fänget an to singen, dat kann wat taun Inlullen sien, wie for de lüttjen Kinners or ook en Schlarer or Volksmusike.

Hei is daropp bedacht, dat dä Affstand tau dän Hasen immer biebehollen wird, immer drummerumme. De twete Minsche hat en Sack or in Mantel in siene Hänne un sien Kreis wort immer dichter. De Hase kunne sick mit siene Ogen un Löppels nur opp eene Parson konzentreeren un dat is de Sänger.

Hat nu de Mantelminsche ne Entfarnung wu hei sick dropschmieten kunne opp dän Hasen, denn makt hei dat ook un griept an. Gröttstendeils is dat denn ook elungen und dä Hase worre an´nt Wochenenne vorspieset taun Middachäten or ihle opp de Fust or Ahmds opp de Stulle.

 

Awer ick glowe soone Fachlüe sinn hüte rar eworn. -Tau sejjen is nur noch dat dä Dorpstratenköters un Hoffhunne ook manichen Dreih rutehat hemm um Hasen to fängen. Awer dä Arinnerung an all dä „Neros“ un „Bellas“ un wie sei ansussten ook immer eheiten hemm, vorgeiht, weil et Dorpstratenköters nich mehr jifft un ook dä groten Hasenjachten inne Börde nich mehr !

* Schrot - viele kleine Bleikugeln, verschiedener Größe